Besigye ashtakiwa kwa kuingia Kampala

                                                        Kiiza Besigye na wafuasi wake

Polisi nchini Uganda wamemfungulia mashtaka kiongozi wa upinzani daktari Kiiza Besigye kwa kujaribu kuingia jijini Kampala kwa msafara wa magari

Msemaji wa polisi anasema kuwa kiongozi huyo wa upinzani alikaidi amri ya kutoingia mjini Kampala kufuatia maelfu ya mashabiki wake kuzingira gari lake huku wengine wengi wakimfuata na kuunda msafara wa magari.

 

                             Uganda yamfungulia Besigye mashtaka

Polisi wanasema kuwa Besigye alikuwa amepewa idhini ya kuhudhuria hafla ya maombi katika makao makuu ya chama chake ilimradi tu asivuruge amani na utangamano mjini Kampala.
Hata hivyo polisi walimzuia alipokuwa katika makutano ya barabara za Mulago na Wandegeya karibu sana kuingia mjini.

polisi walimzuia alipokuwa katika makutano ya barabara za Mulago na Wandegeya

Mwandishi wa BBC aliyeko Kampala Patience Atuhaire anasema polisi wamezuia watu kufuata gari la kiongozi huyo wa chama cha FDC.

Polisi wametumwa kwa wingi eneo hilo.
Gari la Bw Besigye lilibururwa na gari la polisi na kuelekezwa kituo cha polisi cha barabara ya Kira.

Gari la Bw Besigye lilibururwa na gari la polisi na kuelekezwa kituo cha polisi cha barabara ya Kira.

Bw Besigye ambaye amekuwa katika kifungo cha nyumbani alikuwa ndio anatoka nyumbani kwake kwa mara ya kwanza hii leo tangu uchaguzi kufanyika nchini Uganda.

Kiongozi huyo wa upinzani alimaliza katika nafasi ya pili lakini akapinga matokeo hayo ya uchaguzi akisema kuwa rais Museveni alikuwa amefaidika na udanganyifu mwingi na kuwa uchaguzi huo haukuwa wa uhuru wala haki.