Pluijm:Yanga tunahujumiwa

Kocha Mkuu wa Yanga Hans van der Pluijm

 

 YANGA imelalamika kuhujumiwa na Shirikisho la Soka Tanzania (TFF), kwa kile walichodai kuwa ni mzigo kucheza mechi nne ndani ya siku 10.

 

TFF ilitoa ratiba ya mechi za viporo kwa timu za Yanga na Azam, ambazo pia zinaiwakilisha nchi kwenye michuano ya Klabu Afrika.

Marekebisho hayo ya ratiba yamelalamikiwa na timu zote na TFF imeshikilia msimamo wake wa kutopangua tena ratiba.

 

Kocha wa Yanga, Hans van der Pluijm alisema jana kuwa marekebisho hayo yaliyofanywa na TFF ni sawa na hujuma kwao.

Alisema ratiba hiyo ni ngumu kwao na inalenga kuwapoteza kwenye mbio za kutetea ubingwa wao.

 

"Ratiba hii haitupi nafasi ya kutetea ubingwa wetu wa Bara wala kwenda hatua ya makundi Ligi ya Klabu Bingwa Afrika," alisema Pluijm.

 

Juzi Machi 31, Yanga ilicheza mechi ya Kombe la Shirikisho dhidi ya Ndanda FC, kesho itaikaribisha Kagera Sugar na Jumatano itawakabili Mtibwa Sugar kwenye mechi za Ligi Kuu, huku ikishuka uwanjani Jumamosi ijayo kupambana na Al Ahly ya Misri.

 

Akizungumza na Nipashe jana, Pluijm alisema hata kama mechi zote nne zinafanyika kwenye uwanja wa nyumbani, bado ratiba ni ngumu kwetu.

 

Pluijm alisema wachezaji wa Afrika hawakuandaliwa kucheza mechi nyingi kwa muda mfupi na hiyo ilitokana na uwezo wao wa kuhimili ushindani unaosababishwa na mazingira waliyokulia kwenye mchezo huo.

 

"Hali hii si nzuri kwa upande wetu, hata kama ukicheza mechi nyingi timu inakuwa imara, wakati huohuo wachezaji wanachoka, inawafanya wachezaji watumie zaidi uzoefu na si kuonyesha viwango vizuri kama wangepata muda wa kupumzika, namna hii ni hatari, ukipoteza umakini kidogo unampa nafasi mpinzani kutumia makosa yako," alisema kocha huyo.

 

Aliongeza kama ligi ilisimama kupisha maandalizi ya timu ya taifa ilipokuwa inajiandaa kuikabili Algeria, pia kwa uzito uleule ilipaswa Yanga na Azam FC zinazoshiriki ya kimataifa kupewa muda wa kujinoa.

 

"Ni hatari kucheza mechi nyingi za mashindano tofauti kwa wakati mmoja," Pluijm aliongeza.

 

Aliongeza kuwa uzoefu ndiyo uliwasaidia wachezaji wake kupata ushindi wa mabao 2-1 dhidi ya Ndanda FC katika mechi ya hatua ya robo fainali iliyofanyika juzi.

 

Kocha huyo pia aliwataja wachezaji wake wawili wa kimataifa, Amissi Tambwe na Haruna Niyonzima tayari wamewasili nchini na kujiunga na kikosi cha timu hiyo.

 

Tambwe alikuwa Namibia na timu yake ya taifa ya Burundi, wakati  Niyonzima ametokea Rwanda iliyocheza dhidi ya Mauritius.